Mir Taqi Mir

وصل میں رنگ اڑ گیا میرا

کیا جدائی کو منہ دکھاؤں گا

عشق معشوق عشق عاشق ہے

یعنی اپنا ہی مبتلا ہے عشق

مجھ کو شاعر نہ کہو میرؔ کہ صاحب میں نے

درد و غم کتنے کیے جمع تو دیوان کیا

جائے ہے جی نجات کے غم میں

ایسی جنت گئی جہنم میں

میرؔ بندوں سے کام کب نکلا

مانگنا ہے جو کچھ خدا سے مانگ

زخم جھیلے داغ بھی کھائے بہت

دل لگا کر ہم تو پچھتائے بہت

اب آیا دھیان اے آرام جاں اس نا مرادی میں

کفن دینا تمہیں بھولے تھے ہم اسباب شادی میں

عشق میں جی کو صبر و تاب کہاں

اس سے آنکھیں لڑیں تو خواب کہاں

کہا میں نے کتنا ہے گل کا ثبات

کلی نے یہ سن کر تبسم کیا

مرے سلیقے سے میری نبھی محبت میں

تمام عمر میں ناکامیوں سے کام لیا

گفتگو ریختے میں ہم سے نہ کر

یہ ہماری زبان ہے پیارے

سخت کافر تھاجن نے پہلے میرؔ

مذہب عشق اختیار کیا

ہم جانتے تو عشق نہ کرتے کسو کے ساتھ

لے جاتے دل کو خاک میں اس آرزو کے ساتھ

میرؔ ہم مل کے بہت خوش ہوئے تم سے پیارے

اس خرابے میں مری جان تم آباد رہو

سارے عالم پر ہوں میں چھایا ہوا

مستند ہے میرا فرمایا ہوا

دل وہ نگر نہیں کہ پھر آباد ہو سکے

پچھتاؤ گے سنو ہو یہ بستی اجاڑ کر

دل مجھے اس گلی میں لے جا کر

اور بھی خاک میں ملا لایا

پیدا کہاں ہیں ایسے پراگندہ طبع لوگ

افسوس تم کو میرؔ سے صحبت نہیں رہی

دلی کے نہ تھے کوچے اوراق مصور تھے

جو شکل نظر آئی تصویر نظر آئی

جب کہ پہلو سے یار اٹھتا ہے

درد بے اختیار اٹھتا ہے