Ahmed Faraz

میں خود کو بھول چکا تھا مگر جہاں والے

اداس چھوڑ گئے آئینہ دکھا کے مجھے

کچھ مشکلیں ایسی ہیں کہ آساں نہیں ہوتیں

کچھ ایسے معمے ہیں کبھی حل نہیں ہوتے

جو غیر تھے وہ اسی بات پر ہمارے ہوئے

کہ ہم سے دوست بہت بے خبر ہمارے ہوئے

ساقیا ایک نظر جام سے پہلے پہلے

ہم کو جانا ہے کہیں شام سے پہلے پہلے

فرازؔ تو نے اسے مشکلوں میں ڈال دیا

زمانہ صاحب زر اور صرف شاعر تو

فضا اداس ہے رت مضمحل ہے میں چپ ہوں

جو ہو سکے تو چلا آ کسی کی خاطر تو

مے کدے میں کیا تکلف مے کشی میں کیا حجاب

بزم ساقی میں ادب آداب مت دیکھا کرو

فرازؔ تیرے جنوں کا خیال ہے ورنہ

یہ کیا ضرور وہ صورت سبھی کو پیاری لگے

نہ تجھ کو مات ہوئی ہے نہ مجھ کو مات ہوئی

سو اب کے دونوں ہی چالیں بدل کے دیکھتے ہیں

میں بھی پلکوں پہ سجا لوں گا لہو کی بوندیں

تم بھی پا بستہ زنجیر حنا ہو جانا

اس عہد ظلم میں میں بھی شریک ہوں جیسے

مرا سکوت مجھے سخت مجرمانہ لگا

اک یہ بھی تو انداز علاج غم جاں ہے

اے چارہ گرو درد بڑھا کیوں نہیں دیتے

قاصدا ہم فقیر لوگوں کا

اک ٹھکانہ نہیں کہ تجھ سے کہیں

میری خاطر نہ سہی اپنی انا کی خاطر

اپنے بندوں سے تو پندار خدائی لے لے

رات بھر ہنستے ہوئے تاروں نے

ان کے عارض بھی بھگوئے ہوں گے

زندگی پھیلی ہوئی تھی شام ہجراں کی طرح

کس کو اتنا حوصلہ تھا کون جی کر دیکھتا

اجاڑ گھر میں یہ خوشبو کہاں سے آئی ہے

کوئی تو ہے در و دیوار کے علاوہ بھی

تیرے قامت سے بھی لپٹی ہے امر بیل کوئی

میری چاہت کو بھی دنیا کی نظر کھا گئی دوست

لے اڑا پھر کوئی خیال ہمیں

ساقیا ساقیا سنبھال ہمیں

پہلے پہلے ہوس اک آدھ دکاں کھولتی ہے

پھر تو بازار کے بازار سے لگ جاتے ہیں