Jaun Eliya

تمہاری یاد میں جینے کی آرزو ہے ابھی

کچھ اپنا حال سنبھالوں اگر اجازت ہو

وفا اخلاص قربانی محبت

اب ان لفظوں کا پیچھا کیوں کریں ہم

اب جو رشتوں میں بندھا ہوں تو کھلا ہے مجھ پر

کب پرند اڑ نہیں پاتے ہیں پروں کے ہوتے

گنوائی کس کی تمنا میں زندگی میں نے

وہ کون ہے جسے دیکھا نہیں کبھی میں نے

ہر شخص سے بے نیاز ہو جا

پھر سب سے یہ کہہ کہ میں خدا ہوں

زندگی کیا ہے اک کہانی ہے

یہ کہانی نہیں سنانی ہے

یہ بہت غم کی بات ہو شاید

اب تو غم بھی گنوا چکا ہوں میں

اپنے سر اک بلا تو لینی تھی

میں نے وہ زلف اپنے سر لی ہے

شب جو ہم سے ہوا معاف کرو

نہیں پی تھی بہک گئے ہوں گے

خموشی سے ادا ہو رسم دوری

کوئی ہنگامہ برپا کیوں کریں ہم

رویا ہوں تو اپنے دوستوں میں

پر تجھ سے تو ہنس کے ہی ملا ہوں

سب میرے بغیر مطمئن ہیں

میں سب کے بغیر جی رہا ہوں

اور کیا چاہتی ہے گردش ایام کہ ہم

اپنا گھر بھول گئے ان کی گلی بھول گئے

مجھ سے اب لوگ کم ہی ملتے ہیں

یوں بھی میں ہٹ گیا ہوں منظر سے

مجھ کو خواہش ہی ڈھونڈنے کی نہ تھی

مجھ میں کھویا رہا خدا میرا

آج بہت دن بعد میں اپنے کمرے تک آ نکلا تھا

جوں ہی دروازہ کھولا ہے اس کی خوشبو آئی ہے

ہماری ہی تمنا کیوں کرو تم

تمہاری ہی تمنا کیوں کریں ہم

جانیے اس سے نبھے گی کس طرح

وہ خدا ہے میں تو بندہ بھی نہیں

تیغ بازی کا شوق اپنی جگہ

آپ تو قتل عام کر رہے ہیں

میں جرم کا اعتراف کر کے

کچھ اور ہے جو چھپا گیا ہوں