Jaun Eliya

ہم یہاں خود آئے ہیں لایا نہیں کوئی ہمیں

اور خدا کا ہم نے اپنے نام پر رکھا ہے نام

میں بستر خیال پہ لیٹا ہوں اس کے پاس

صبح ازل سے کوئی تقاضا کیے بغیر

خدا سے لے لیا جنت کا وعدہ

یہ زاہد تو بڑے ہی گھاگ نکلے

ہو کبھی تو شراب وصل نصیب

پئے جاؤں میں خون ہی کب تک

جمع ہم نے کیا ہے غم دل میں

اس کا اب سود کھائے جائیں گے

اب نہیں ملیں گے ہم کوچۂ تمنا میں

کوچۂ تمنا میں اب نہیں ملیں گے ہم

جان من تیری بے نقابی نے

آج کتنے نقاب بیچے ہیں

شام ہوئی ہے یار آئے ہیں یاروں کے ہم راہ چلیں

آج وہاں قوالی ہوگی جونؔ چلو درگاہ چلیں

پھر اس گلی سے اپنا گزر چاہتا ہے دل

اب اس گلی کو کون سی بستی سے لاؤں میں

جونؔ دنیا کی چاکری کر کے

تو نے دل کی وہ نوکری کیا کی

اب خاک اڑ رہی ہے یہاں انتظار کی

اے دل یہ بام و در کسی جان جہاں کے تھے

نئی خواہش رچائی جا رہی ہے

تری فرقت منائی جا رہی ہے

ہمیں شکوہ نہیں اک دوسرے سے

منانا چاہئے اس پر خوشی کیا

یاد آتے ہیں معجزے اپنے

اور اس کے بدن کا جادو بھی

کیا تھا عہد جب لمحوں میں ہم نے

تو ساری عمر ایفا کیوں کریں ہم

میں کہوں کس طرح یہ بات اس سے

تجھ کو جانم مجھی سے خطرہ ہے

گھر سے ہم گھر تلک گئے ہوں گے

اپنے ہی آپ تک گئے ہوں گے

میں سہوں کرب زندگی کب تک

رہے آخر تری کمی کب تک

ہم عجب ہیں کہ اس کی باہوں میں

شکوۂ نارسائی کرتے ہیں

تجھ کو خبر نہیں کہ ترا کرب دیکھ کر

اکثر ترا مذاق اڑاتا رہا ہوں میں