Jaun Eliya

پوچھ نہ وصل کا حساب حال ہے اب بہت خراب

رشتۂ جسم و جاں کے بیچ جسم حرام ہو گیا

اس کے ہونٹھوں پہ رکھ کے ہونٹھ اپنے

بات ہی ہم تمام کر رہے ہیں

دو جہاں سے گزر گیا پھر بھی

میں رہا خود کو عمر بھر درپیش

کس سے اظہار مدعا کیجے

آپ ملتے نہیں ہیں کیا کیجے

جونؔ جنوب زرد کے خاک بسر یہ دکھ اٹھا

موج شمال سبز جاں آئی تھی اور چلی گئی

رکھو دیر و حرم کو اب مقفل

کئی پاگل یہاں سے بھاگ نکلے

آپ اپنی گلی کے سائل کو

کم سے کم پر سوال تو رکھئے

بہت کترا رہے ہو مغبچوں سے

گناہ ترک بادہ کر لیا کیا

مرہم ہجر تھا عجب اکسیر

اب تو ہر زخم بھر گیا ہوگا

سوچا ہے کہ اب کار مسیحا نہ کریں گے

وہ خون بھی تھوکے گا تو پروا نہ کریں گے

ہم ترا ہجر منانے کے لیے نکلے ہیں

شہر میں آگ لگانے کے لیے نکلے ہیں

مری شراب کا شہرہ ہے اب زمانے میں

سو یہ کرم ہے تو کس کا ہے اب بھی آ جاؤ

یہ پیہم تلخ کامی سی رہی کیا

محبت زہر کھا کر آئی تھی کیا

رہن سرشاریٔ فضا کے ہیں

آج کے بعد ہم ہوا کے ہیں

کسی کے بن کسی کی یاد کے بن

جیئے جانے کی ہمت ہے نہیں تو

انقلاب ایک خواب ہے سو ہے

دل کی دنیا خراب ہے سو ہے

کتنی وحشت ہے درمیان ہجوم

جس کو دیکھو گیا ہوا ہے کہیں

دل اب دنیا پہ لعنت کر کہ اس کی

بہت خدمت گزاری ہو گئی ہے

کیا ہوئے صورت نگاراں خواب کے

خواب کے صورت نگاراں کیا ہوئے

سینہ دہک رہا ہو تو کیا چپ رہے کوئی

کیوں چیخ چیخ کر نہ گلا چھیل لے کوئی