Jaun Eliya

مجھ کو یہ ہوش ہی نہ تھا تو مرے بازوؤں میں ہے

یعنی تجھے ابھی تلک میں نے رہا نہیں کیا

زمانہ تھا وہ دل کی زندگی کا

تری فرقت کے دن لاؤں کہاں سے

حملہ ہے چار سو در و دیوار شہر کا

سب جنگلوں کو شہر کے اندر سمیٹ لو

ہم کو ہرگز نہیں خدا منظور

یعنی ہم بے طرح خدا کے ہیں

یہ غم کیا دل کی عادت ہے نہیں تو

کسی سے کچھ شکایت ہے نہیں تو

ایک قتالہ چاہئے ہم کو

ہم یہ اعلان عام کر رہے ہیں

کچھ تو رشتہ ہے تم سے کم بختوں

کچھ نہیں کوئی بد دعا بھیجو

حسن کہتا تھا چھیڑنے والے

چھیڑنا ہی تو بس نہیں چھو بھی

اب کہ جب جانانہ تم کو ہے سبھی پر اعتبار

اب تمہیں جانانہ مجھ پر اعتبار آیا تو کیا

ان لبوں کا لہو نہ پی جاؤں

اپنی تشنہ لبی سے خطرہ ہے

رائیگاں وصل میں بھی وقت ہوا

پر ہوا خوب رائیگاں جاناں

میں لے کے دل کے رشتے گھر سے نکل چکا ہوں

دیوار و در کے رشتے دیوار و در میں ہوں گے

اک حسن بے مثال کی تمثیل کے لیے

پرچھائیوں پہ رنگ گراتا رہا ہوں میں

ہائے وہ اس کا موج خیز بدن

میں تو پیاسا رہا لب جو بھی

شاید وہ دن پہلا دن تھا پلکیں بوجھل ہونے کا

مجھ کو دیکھتے ہی جب اس کی انگڑائی شرمائی ہے

نہ رکھا ہم نے بیش و کم کا خیال

شوق کو بے حساب ہی لکھا

شیشے کے اس طرف سے میں سب کو تک رہا ہوں

مرنے کی بھی کسی کو فرصت نہیں ہے مجھ میں

ثابت ہوا سکون دل و جاں کہیں نہیں

رشتوں میں ڈھونڈھتا ہے تو ڈھونڈا کرے کوئی

اے صبح میں اب کہاں رہا ہوں

خوابوں ہی میں صرف ہو چکا ہوں

مجھے غرض ہے مری جان غل مچانے سے

نہ تیرے آنے سے مطلب نہ تیرے جانے سے