Mir Taqi Mir

اس پہ تکیہ کیا تو تھا لیکن

رات دن ہم تھے اور بستر تھا

ہر قدم پر تھی اس کی منزل لیک

سر سے سودائے جستجو نہ گیا

رفتگاں میں جہاں کے ہم بھی ہیں

ساتھ اس کارواں کے ہم بھی ہیں

کعبے میں جاں بہ لب تھے ہم دوریٔ بتاں سے

آئے ہیں پھر کے یارو اب کے خدا کے ہاں سے

اس دشت میں اے سیل سنبھل ہی کے قدم رکھ

ہر سمت کو یاں دفن مری تشنہ لبی ہے

سدا ہم تو کھوئے گئے سے رہے

کبھو آپ میں تم نے پایا ہمیں

معرکہ گرم تو ہو لینے دو خوں ریزی کا

پہلے شمشیر کے نیچے ہمیں جا بیٹھیں گے

کہنا تھا کسو سے کچھ تکتا تھا کسو کا منہ

کل میر کھڑا تھا یاں سچ ہے کہ دوانہ تھا

کیا تھا ریختہ پردہ سخن کا

سو ٹھہرا ہے یہی اب فن ہمارا

فرصت میں اک نفس کے کیا درد دل سنوگے

آئے تو تم ولیکن وقت اخیر آئے

دعویٰ کیا تھا گل نے ترے رخ سے باغ میں

سیلی لگی صبا کی تو منہ لال ہو گیا

دل کہ یک قطرہ خوں نہیں ہے بیش

ایک عالم کے سر بلا لایا

گر ٹھہرے ملک آگے انھوں کے تو عجب ہے

پھرتے ہیں پڑے دلی کے لونڈے جو پری سے

چلتے ہو تو چمن کو چلئے کہتے ہیں کہ بہاراں ہے

پات ہرے ہیں پھول کھلے ہیں کم کم باد و باراں ہے

وصل و ہجراں دو جو منزل ہیں یہ راہ عشق میں

دل غریب ان میں خدا جانے کہاں مارا گیا

جب ہم کلام ہم سے ہوتا ہے پان کھا کر

کس رنگ سے کرے ہے باتیں چبا چبا کر

پوشیدہ راز عشق چلا جائے تھا سو آج

بے طاقتی نے دل کی وہ پردہ اٹھا دیا

ان نے تو تیغ کھینچی تھی پر جی چلا کے میرؔ

ہم نے بھی ایک دم میں تماشا دکھا دیا

پاؤں کے نیچے کی مٹی بھی نہ ہوگی ہم سی

کیا کہیں عمر کو اس طرح بسر ہم نے کیا

مت رنجہ کر کسی کو کہ اپنے تو اعتقاد

دل ڈھائے کر جو کعبہ بنایا تو کیا ہوا