Mir Taqi Mir

عالم عالم عشق و جنوں ہے دنیا دنیا تہمت ہے

دریا دریا روتا ہوں میں صحرا صحرا وحشت ہے

سمجھے تھے ہم تو میر کو عاشق اسی گھڑی

جب سن کے تیرا نام وہ بیتاب سا ہوا

کتنی باتیں بنا کے لاؤں لیک

یاد رہتیں ترے حضور نہیں

چاہ کا دعویٰ سب کرتے ہیں مانیں کیوں کر بے آثار

اشک کی سرخی منہ کی زردی عشق کی کچھ تو علامت ہو

میرؔ کو کیوں نہ مغتنم جانے

اگلے لوگوں میں اک رہا ہے یہ

آئے ہو گھر سے اٹھ کر میرے مکاں کے اوپر

کی تم نے مہربانی بے خانماں کے اوپر

اب مجھ ضعیف و زار کو مت کچھ کہا کرو

جاتی نہیں ہے مجھ سے کسو کی اٹھائی بات

صد موسم گل ہم کو تہ بال ہی گزرے

مقدور نہ دیکھا کبھو بے بال و پری کا

ہم نے جانا تھا لکھے گا تو کوئی حرف اے میرؔ

پر ترا نامہ تو اک شوق کا دفتر نکلا

کچھ نہ دیکھا پھر بجز یک شعلۂ پر پیچ و تاب

شمع تک تو ہم نے دیکھا تھا کہ پروانہ گیا

رات تو ساری گئی سنتے پریشاں گوئی

میرؔ جی کوئی گھڑی تم بھی تو آرام کرو

دل سے شوق رخ نکو نہ گیا

جھانکنا تاکنا کبھو نہ گیا

آہ سحر نے سوزش دل کو مٹا دیا

اس باد نے ہمیں تو دیا سا بجھا دیا

کیا آج کل سے اس کی یہ بے توجہی ہے

منہ ان نے اس طرف سے پھیرا ہے میرؔ کب کا

سبز ہوتی ہی نہیں یہ سرزمیں

تخم خواہش دل میں تو بوتا ہے کیا

ہیں عناصر کی یہ صورت بازیاں

شعبدے کیا کیا ہیں ان چاروں کے بیچ

قبائے لالہ و گل میں جھلک رہی تھی خزاں

بھری بہار میں رویا کیے بہار کو ہم

داغ آنکھوں سے کھل رہے ہیں سب

ہاتھ دستہ ہوا ہے نرگس کا

لکھتے رقعہ لکھے گئے دفتر

شوق نے بات کیا بڑھائی ہے

عجز و نیاز اپنا اپنی طرف ہے سارا

اس مشت خاک کو ہم مسجود جانتے ہیں